Султаналиева Рая Мамакеевна
каф. башчысы, ф-м.и.д., профессор
Султаналиева Рая Мамакеевна кафедранын башчысы, физика-математика илимдеринин доктору, профессор, 1975-жылы «50 жыл СССР» атындагы Кыргыз Мамлекеттик Университетин бүткөн. Кесиби «Физик», «Физика окутуучу».
Эмгек жолун 1975-жылы Фрунзе политехникалык институтунун «Физика» кафедрасынан баштап, жумушунун бардык тепкичтерин басып ѳткѳн: улуу лаборант, окутуучу, улуу окутуучу, доцент, профессор, кафедра башчысы болуп эмгектенген. 1999 – жылы «Деформацияланган катуу телолордун механикасы» кесипчилиги боюнча кандидаттык диссертациясын коргоп, физика-математика илимдерини кандидаты даражасын алган. 2000- жылдан бери адегенде «Жалпы физика» кафедрасынын башчысы болуп, азыркы күндѳ КМТУнун «Физика» кафедрасынын башчысы болуп эмгектенет.
2016-жылы «Деформацияланган катуу телолордун механикасы» кесипчилиги боюнча доктордук диссертациясын коргоп, физика-математика илимдеринин доктору даражасын алып, айтылган кесип боюнча аялдардын ичинен биринчи доктор болду.
Султаналиева Рая Мамакеевна 100дѳн ашык илимий-методикалык иштердин автору, алардын ичинде кыргыз жана орус тилдериндеги окуу куралдар, ар кандай усулдук кѳрсѳтмѳлѳр, илимий монографиясы, ойлоп чыгарууга берилген патенти бар. Анын кыргыз тилиндеги чыккан окуу куралдары бир нече ирет 1-,2- даражадагы дипломдорго ээ болгон.
2000-жылдан бери кафедрада Кыргыз Республикасынын билим жана илим министрлигинин гранты боюнча илимий проектин жетекчиси болуп келет. Ар жыл сайын илимий-техникалык конференцияларга, эл аралык симпозиумдарга, семинарларга активдүү катышат. Илимий диссертацияларга пикирлерди жазып, кандидаттык илимдерге оппонент катары катышып, аспиранттарды, изилдѳѳчүлѳрдү жетектейт.
2000-жылдан тартып мектеп окуучуларынын физика боюнча олимпиадаларын уюштуруп, азыркы күнгѳ чейин шаардык, Республикалык олимпиадалардын жюрисинин тѳрайымы болуп келет. Анын жетекчилиги менен Азия жана Эл аралык олимпиадаларга окуучуларды тандоо жүрѳт. Султаналиева Рая Мамакеевна 2003-жылдан тарта дүйнѳлүк олимпиадаларга Кыргызстандын командасынын жетекчиси болуп келет. Бул жылдардын ичинде кыргыз окуучулары Эл аралык олимпиадалрдан бир нече күмүш, коло медалдарды жана Ардак грамоталарынын ээси болушкан.
Султаналиева Рая Мамакеевна коомдук иштерге да активдүү катышат. Ал Университеттин илимий кеңешинин, энергетика факультетинин илимий кеңешинин жана сыйлыктар боюнча комиссиясынын мүчѳсү.
Окуу-тарбия, илимий-изилдѳѳ иштери боюнча, кѳп жыл ак эмгектери үчүн Университеттин бир нече Ардак грамоталары, Бишкек шаарынын билим берүү департаментинин, Кыргыз Республикасынын Энергетика жана ѳндүрүш министрлигинин Ардак грамоталары менен сыйланган.
1998-жылдан бери Кыргыз Республикасынын билим берүүсүнүн отличниги, 2003- жылы Кыргыз Республикасынын профсоюздарынын билим жана илим боюнча отличнигин алган. КТУнун 50-жылдык юбилейине карата 2004- жылы Кыргыз Республикасынын Ардак Грамотасын алган. 2007- жылы КМТУнун «Мыкты доцент» наамына татыктуу болгон. 2008- жылы ага Кыргыз Мамлекеттик Техникалык Университетинин профессору наамы ыйгарылган. 2010-жылы «Кыргыз Республикасынын билим берүүсүнүн ардактуу кызматкери» жогору даражасына ээ болгон. 2014-жылы КМТУнун 60-жылдыгына карата юбилейлик медалдын, Кыргыз Республикасынын «Физика коомунун» Ардак грамотасынын жана 2016- жылы Кыргыз Республикасынын мамлекеттик тил боюнча комиссиясынын Ардак грамотасын алган.
Султаналиева Рая Мамакеевна 42 жыл эмгегинин ичинде Университеттин билим берүүсүнѳ, келечек муундарды даярдоодо жана тарбиялоодо, илимий иштерине чон салым кошуп, ѳзүнүн кесибинин чыныгы кесипкѳйү жана жаштардын насаатчысына айланды.
