Өнөр жай өнөктөштөрү

Кафедра ири курулуш жана долбоорлоо уюмдары, каржы- насыя мекемелери, камсыздандыруу компаниялары жана башка уюмдар менен тыгыз кызматташат. Бул кызматташтык илимий изилдөөлөрдү биргеликте жүргүзүүгө, алардын жыйынтыктарын ишке ашырууга, студенттердин илимий-өндүрүштүк, илимий-изилдөө жана алдын ала квалификациялык практикаларын уюштурууга өбөлгө түзөт. Практикадан өтүү үчүн студенттерди квалификациялуу жетекчилер менен камсыз кылуу максатында тиешелүү келишимдер түзүлгөн.

Кафедра жыл сайын мамлекеттик органдардан жана жеке ишканалардан өкүлдөрдү чакырып, тегерек столдорду жана конок лекцияларын өткөрөт. Бул иш-чаралар жогорку квалификациялуу кадрларды даярдоо жана "Билим – илим – өндүрүш" системасын ишке ашыруу максатында уюштурулат.

2020-жылдын 12-мартында ИЭМдин башка кафедралары менен биргеликте "580100 – Экономика" жана "580200 – Менеджмент" багыттары боюнча жогорку билимдүү адистерди даярдоо маселелери боюнча стейкхолдерлердин заманбап көз караштары" аттуу тегерек стол өткөрүлдү.

2022-жылдын 22-ноябрында И.Раззаков атындагы КМТУда "Кыргыз Республикасында инновациялык экономикалык өнүгүүнүн актуалдуу маселелери" аттуу тегерек стол өткөрүлдү. Бул иш-чара Жогорку экономика жана бизнес мектеби (ЖЭБМ) тарабынан демилгеленип, билим берүү уюмдары, бизнес чөйрөсү жана чет элдик өнөктөш университеттер менен кызматташтыкты күчөтүүгө багытталган.

2023-жылдын 15-ноябрында ЖЭБМ КМТУ "Кыргызстанда илим жана бизнес үчүн санариптештирүү: реалдуулук жана келечек" деген темада тегерек стол өткөрдү. Бул иш-чарада билим берүү мекемелери менен стейкхолдерлер ортосунда санариптик трансформация боюнча диалог жүргүзүү үчүн платформа түзүлдү.

2024-жылдын 18-апрелинде КМТУда "Эсепчи жана финансист кесибиндеги инновациялар жана эмгек рыногунда санариптештирүүнүн таасири" деген темада тегерек стол өткөрүлдү. Бул иш-чарага мамлекеттик органдардын өкүлдөрү, бизнес-коомчулуктун өкүлдөрү, илимий чөйрө жана студенттер катышты. Талкуу учурунда мамлекеттик органдардын жана жеке сектордун муктаждыктары эске алынып, санариптештирүү доорунда эмгек рыногунун талаптары изилденди.

2025-жылдын 27-февралында КМТУда "Карьера жана практика күнү" аттуу кеңири масштабдуу иш-чара өткөрүлдү. Бул иш-чара студенттерди, бүтүрүүчүлөрдү жана иш берүүчүлөрдү бириктирүүгө багытталган. Иш-чара эки этапта өттү:

• Таңкы бөлүк: саат 09:00 – 12:00 (Кампус 2, Н. Исанов көчөсү, 34б, 8-корпус, БАЗ).
• Түштөн кийинки бөлүк: саат 14:00 – 16:00 (КМТУнун башкы корпусу, Ч. Айтматов пр., 66, БАЗ).

Бул иш-чара студенттерге жана бүтүрүүчүлөргө ишке орношуу, стажировка өтүү жана кесиптик өнүгүү мүмкүнчүлүгүн түздү. Мамлекеттик мекемелер, каржы уюмдары, курулуш жана өнөр жай компаниялары, жеке ишканалар иш-чарага өнөктөш катары катышты. Кээ бир иш берүүчүлөр КМТУ менен узак мөөнөттүү кызматташууга жана кошумча конок лекцияларды уюштурууга кызыгуусун билдиришти.

Кафедра иш-чарага төмөнкү өнөктөштөр менен катышты:

• Кыргыз Республикасынын Каржы министрлигинин Мамлекеттик салык кызматы.
• ААК. "Бакай Банк"
• ЖАК МФК "Элет-Капитал" (Сокулук филиалы).
• "НСК" камсыздандыруу компаниясы.
• ЖЧК."Эко Комплекс"

"Бакай Банк" студенттер үчүн кызыктуу презентация уюштуруп, бренд белектерди ойнотту. Мындан тышкары, Kahoot-викторинасында БУА-1-21 тайпасынын студенттери Тойболотова М. жана Чонбагышева Н. байгелүү орундарды ээлешти.

Бул иш-чара ийгиликтүү өтүп, студенттер менен потенциалдуу иш берүүчүлөрдүн ортосунда бекем байланыш түзүлдү. Катышуучулар пайдалуу маалымат алышып, иш берүүчүлөр жаш адистер менен таанышуу мүмкүнчүлүгүнө ээ болушту.