"2026-жылдын 24-мартында И. Раззаков атындагы Кыргыз мамлекеттик техникалык университетинде Карьера жана практика күнү өткөрүлдү"

И. Раззаков атындагы Кыргыз мамлекеттик техникалык университетинде Карьера жана практика күнү өткөрүлүп, ал студенттерди, бүтүрүүчүлөрдү жана алдыңкы иш берүүчүлөрдү бириктирди.

Иш-чара Бишкек шаардык калкты иш менен камсыз кылууга көмөктөшүү башкармалыгынын колдоосу менен университеттин үч кампусунда бир убакта өттү. Бул студенттер менен потенциалдуу иш берүүчүлөрдүн түз байланыш түзүүсүнө, ошондой эле жаштардын кесиптик өнүгүүсү жана жумушка орношуу маселелерин талкуулоого маанилүү аянтча болду.

И. Раззаков атындагы Кыргыз мамлекеттик техникалык университетинин Н. Исанов атындагы 2-кампусунда өткөн ачылыш аземинде ректордун кеңешчиси Абдыкалыков Акымбек Абдыкалыкович жана илимий иштер боюнча проректор Елеманова Римма Шукуровна сөз сүйлөштү. Алар өз баяндамаларында практикага багытталган билим берүүнүн маанисин, студенттердин кесиптик компетенцияларын өнүктүрүүнүн зарылдыгын жана университет менен иш берүүчүлөрдүн өнөктөштүгүн бекемдөөнүн маанисин белгилешти.

Программанын алкагында 2-кампуста ишканалардын жана уюмдардын презентациялары өттү. Катышуучулардын алдында «Бишкекурулуш» ААК, «АСМАТ» архитектуралык бюросу, «Демир Банк» ЖАК, ошондой эле Кыргыз Республикасынын Улуттук статистика комитетинин Статистикалык изилдөөлөр жана квалификацияны жогорулатуу институтунун өкүлдөрү чыгышты.

Иш-чаранын негизги бөлүктөрүнүн бири бош жумуш орундар жарманкеси болду. Студенттер жумушка орношуу боюнча кеңештерди алышып, актуалдуу вакансиялар менен таанышып, иш берүүчүлөр менен түз байланыш түзүүгө мүмкүнчүлүк алышты. Алар эмгек рыногунун талаптары жана практикадан өтүү мүмкүнчүлүктөрү тууралуу маалымат алышты.

Программанын экинчи бөлүгүндө тармактык секциялар уюштурулду. «Кыргыздортранспроект» долбоорлоо институтунун инженердик-изилдөө бөлүмүнүн башчысынын орун басары Нурлан Абдижапарович Жусупов мындай иш-чараларды үзгүлтүксүз өткөрүүнүн маанилүүлүгүн белгилеп, бул студенттер менен бүтүрүүчүлөрдүн жумушка орношуусуна көмөк көрсөтүп, иш берүүчүлөр менен туруктуу байланыштарды түзүүгө жана жаш адистердин атаандаштыкка жөндөмдүүлүгүн жогорулатууга өбөлгө түзөрүн айтты.

Ошондой эле Карьера жана практика күнүнүн алкагында мастер-класстар жана конок лекциялар өткөрүлүп, катышуучулар жаңы билимдерди, практикалык сунуштарды жана баалуу кесиптик тажрыйбаны алышты.

Мындай иш-чараларды өткөрүү билим берүү менен эмгек рыногунун ортосундагы байланыштарды чыңдоого көмөктөшүп, студенттерге өз кесиптик жолун ишенимдүү түзүүгө жана ийгиликтүү карьера баштоого кеңири мүмкүнчүлүктөрдү ачат.