Жаңылыктар

2025-жылдын 20-ноябрынан 22-ноябрына чейин Дүйшөмбү шаарында КМШга мүчө мамлекеттердин мектептеринин тамактануу форуму болуп өттү. Форумда өлкө боюнча билим берүү мекемелеринде сапаттуу, коопсуз жана тең салмактуу тамактанууну камсыздоо маселеси талкууланды. Иш-чара тиешелүү министрликтердин, эл аралык уюмдардын өкүлдөрүн, эксперттерди, билим берүү жана саламаттыкты сактоо тармагында иштеген адистерди бириктирди.

Уюштуруучулар белгилеп кеткендей, «Шериктештик өлкөлөрүнүн билим берүү мекемелеринде окуучулардын тамактануусун уюштуруу темасы, албетте, актуалдуу жана сапаттуу, коопсуз жана тең салмактуу тамактанууну камсыздоо боюнча чараларды көрүп жаткан КМШга мүчө-мамлекеттердин саламаттыкты сактоо жана билим берүү министрликтерин кызыктырат. Форумдун жүрүшүндө тармактык министрликтердин өкүлдөрү өз өлкөлөрүндө мектеп тамак-ашын уюштуруу боюнча өз тажрыйбалары менен тааныштыра алышты жана бул жаатта КМШ аймагынын алкагында кызматташуу боюнча сунуштарын айтышты».

Бириккен Улуттар Уюмунун Бүткүл дүйнөлүк азык-түлүк программасы (БУУ БДАТП) мектептерди тамактандыруу системасын практикалык жана техникалык жактан өнүктүрүүгө жардам көрсөтүү менен өлкөлөргө колдоо көрсөтүүдө негизги ролду ойнойт. БУУ БДАТП мектеп ашканасын жана ашкана инфраструктурасын модернизациялоону колдойт, адам ресурстарын өнүктүрүүгө жардам берет, сатып алууларды жана менюну пландаштырууда заманбап ыкмаларды ишке ашырууга жана өлкөлөр ортосунда ийгиликтүү тажрыйба алмашууга көмөктөшөт.

Кыргызстандан Кыргыз Республикасынын Агартуу министрлигинин, Саламаттыкты сактоо министрлигинин өкүлдөрү, ошондой эле мектептеги тамактануу тармагында иштеген уюмдардын адистери кирген делегация катышууда. Кыргыз Республикасы Бүткүл дүйнөлүк азык-түлүк программасы көп жылдардан бери мектептерди тамактандырууну жакшыртууга, анын ичинде инфраструктураны жакшыртууга, ысык тамак киргизүүгө жана жергиликтүү ишке ашыруу механизмдерин иштеп чыгууга колдоо көрсөтүп келе жаткан өлкөлөрдүн бири.

Форумдун жүрүшүндө кыргыз делегациясы мектептеги тамактануу системасын өнүктүрүү, окуучулардын ысык тамакка жеткиликтүүлүгүн кеңейтүү, мектеп менюларынын коопсуздугун жана азыктык баалуулугун жогорулатуу боюнча улуттук тажрыйбасы менен тааныштырды. БУУнун Бүткүл дүйнөлүк азык-түлүк программасы менен биргелешкен демилгелерге жана кызматташуунун практикалык натыйжаларына өзгөчө көңүл бурулду.

Кыргыз Республикасы Форумга катышууну тажрыйба алмашуу, КМШ өлкөлөрү жана эл аралык өнөктөштөр менен кызматташууну чыңдоо жана аймактагы мектептердин сапаттуу жана туруктуу тамактануусун мындан ары өнүктүрүүгө багытталган заманбап чечимдерди иштеп чыгуу үчүн маанилүү мүмкүнчүлүк катары карайт.

И.Раззаков атындагы КМТУнун Республикалык компетенция борборунда “Мыкты мектептин ашпозчусу – 2025” сынагынын финалдык туру өттү.

2025-жылдын 5-ноябрында И.Раззаков атындагы КМТУнун Республикалык компетенция борборунда “Мыкты мектептин ашпозчусу – 2025” сынагынын финалдык туру болуп өттү.

Иш-чара КР Агартуу министрлигинин, БУУнун Бүткүл дүйнөлүк азык-түлүк программасынын (БДАТП) жана КМШнын окуучулардын тамактануусу боюнча базалык уюму «Тармактык тамактануу институтунун»  (АКЭУ) колдоосу менен уюштурулду.

Кыргызстандагы «Тармактык тамактануу институту» (АКЭУ) долбоорунун координатору Зарина Токтоболотова билдиргендей, финалга өлкөнүн бардык аймактарынан келген жети мыкты мектеп ашпозчулары ат салышты. Ар бир катышуучу катуу тандоо процессинен өтүп, борбор калаага мектеп менюсу үчүн атайын иштелип чыккан ысык тамактын өздүк рецептин алып келишти.

Тамактарга негизги талаптар:

* бир порциянын баасы - 30 сомдон ашык эмес;

* жергиликтүү ингредиенттерди колдонуу;

* жашылчалардын же мөмөлөрдүн милдеттүү түрдө кошулушу.

Финалдык сынак үч негизги этапты камтыды: чыгармачылык презентация, санитардык нормаларды текшерүү жана практикалык көндүмдөрдү көрсөтүү. Катышуучулар рецепттин концепциясын жана тамак жасоонун ыкмаларын түшүндүрүп, өздөрүнүн тамактарын көрсөтүштү. Калыстар тобу тамактын даамын, тамакты бере билүүсүн жана мектептин менюсуна киргизүүнүн жүйөсүн баалашты.

Сынактын жеңүүчүлөрү:

* 1-орун - Алтынай Жарматова, А.Төралиев атындагы орто мектептин ашпозчусу. (Баткен облусу);

* 2-орун - Сайракан Мамбеталиева, №64 мектептин ашпозчусу (Бишкек шаары);

* 3-орун - Саадабекова Лунара, С.Дуйшенбиев атындагы мектептин ашпозчусу. (Талас району).

Жеңүүчүлөргө ашкана жабдууларын сатып алууга сертификаттар тапшырылды:

— 1-орунга 50 000 сом;

— 2-орунга 30 000 сом;

— 3-орунга 20 000 сом.

Калган финалисттер эстеликке белектер жана сертификаттар менен сыйланышты.

Демилге мектеп ашпозчуларынын кесипкөй коомчулугун өнүктүрүү, мектептеги тамак-аштын сапатын жакшыртуу жана алдыңкы тажрыйбаны өлкө боюнча жайылтуу максатын көздөйт.

Республикалык компетенция борбору Бириккен Улуттар Уюмунун Дүйнөлүк азык-түлүк программасы (БУУ БДАТП) жана Бириккен Улуттар Уюмунун Азык-түлүк жана айыл чарба уюму (ФАО) Кыргыз Республикасынын Суу чарба, айыл чарба жана кайра иштетүү өнөр жай министрлиги менен биргеликте Бүткүл дүйнөлүк азык-түлүк күнүнө арналган салтанатка катышты.

Майрамдык салтанат 18-октябрда Кыргыз улуттук академиялык драма театрында өтүп, тажрыйба алмашуу, шыктандыруу жана туруктуу айыл чарба идеяларын жайылтуу үчүн маанилүү аянтча болуп калды.

Республикалык компетенция борбору уюштуруучуларды жана бардык катышуучуларды майрамдын ийгиликтүү өтүшү менен кызуу куттуктайт! Алардын биргелешкен аракети өлкөбүздүн азык-түлүк коопсуздугун чыңдоого жана айыл аймактарын өнүктүрүүгө салым кошсун.

2025-жылдын июнь-август айларында РКБ БУУнун Бүткүл дүйнөлүк азык-түлүк программасы менен биргеликте Чүй мектеп-интернатынын 30 окуучусуна дипломдорду тапшырды.

Окутуу «Кулинардык чеберчилик» и «Кондитердик чеберчилик» программалары боюнча өттү. Угуучулар 320 сааттык квалификацияны жогорулатуу курсунан ийгиликтүү өтүп,  «III категориядагы Кулинар-повар» и « III категориядагы Кондитер-повар » квалификациясына ээ болушту.

Бул демилге окуучулардын кесиптик көндүмдөрүн өнүктүрүүгө жана келечекте ишке орношуу мүмкүнчүлүктөрүн кеңейтүүгө багытталган