Пайдалуу кендерди чалгындоонун техникасы жана технологиясы
1996-жылы академик Усенгазы Асаналиев атындагы Кыргыз тоо-кен жана металлургия институтунун чечими менен 13.08.1996-жылдагы №01/205 буйругунун негизинде «Чалгындоо геофизикасы» кафедрасы ачылган. Бул кафедранын ачылышы Кыргыз Республикасында көптөгөн кендердин ачылышына байланыштуу тоо-кен өнөр жайы менен илимий-өндүрүштүк ишканаларга адистерге болгон муктаждыктын өсүшү менен шартталган. Кафедраны техникалык илимдердин доктору, профессор Бакиров Калыс Берикович жетектеген.
2008-жылы «Пайдубалдуу кендерди чалгындоонун техникасы жана технологиясы» аттуу экинчи кафедра түзүлгөн. 2009-жылы аталган кафедра «Мунай жана газ геологиясы» деп өзгөртүлүп, кафедра башчысы болуп улук илимий кызматкер, геология-минералогия илимдеринин кандидаты Мамбетов Аманбек Мамбетович дайындалган.
2017-жылы түзүмдүк бөлүмдөрдү оптималдаштыруу максатында эки кафедра бириктирилип, «Чалгындоо геофизикасы, кен чалгындоонун техникасы жана технологиясы» кафедрасы түзүлгөн. 2021-жылы кафедра «Геологиялык чалгындоонун технологиясы» деп өзгөртүлгөн.
2023-жылдын 27-июнундагы №01/170 буйрукка ылайык, кафедра «Пайдубалдуу кендерди чалгындоонун техникасы жана технологиясы» деп кайрадан аталды. Учурда кафедранын башчысы милдетин техникалык илимдердин кандидаты, доцент Байкелова Гулмира Шакиновна аткарууда.
Ар кандай мезгилдерде кафедрада геология жана геофизика тармагында белгилүү адистер иштеп келишкен. Алардын ичинде: геология-минералогия илимдеринин доктору, профессор Осмонбетов К.О., Кыргыз Республикасынын Улуттук илимдер академиясынын корреспондент-мүчөсү Турдукулов А.Т., ошондой эле методикалык жардам көрсөтүп, сабактарды алып барган илимпоздор – геология илимдеринин кандидаты Пенкин Н.А., геология-минералогия илимдеринин кандидаты Шакиров Э.Ш., физика-математика илимдеринин доктору Погребной В.Н., геология-минералогия илимдеринин кандидаты Фортуна А.Б., ошондой эле улук геофизиктер: Югай Н.В., Маринченко Г.Г. жана башкалар.
Кафедранын негизги максаты – геологиялык, тоо-кен жана тоо-металлургиялык тармактар үчүн жогорку квалификациялуу тоо-кен инженери-геологдорду даярдоо. Студенттер геофизикалык ыкмалардын теориялык негиздерин, бургулоо техникасы жана технологияларын өздөштүрүп, заманбап геофизикалык аппараттык комплекстерде, бургулоо машиналарында жана башка жабдууларда иштөө боюнча практикалык көндүмдөрдү алышат.