Новости
Kent State University делегациясы КМТУга расмий сапар менен келди
28–30-сентябрь күндөрү И. Раззаков атындагы Кыргыз мамлекеттик техникалык университетине (КМТУ) АКШнын Kent State University делегациясы расмий визит менен келди.
Делегациянын курамына төмөнкүлөр кирди:
• Марчелло Фантони (Marcello Fantoni) — Kent State Universityнин вице-президенти;
• Айя Худайбергенова (Ayya Hudaybergenova) — Эл аралык байланыштар башкармалыгынын директору.
Сапар быйылкы жылдын февраль айында КМТУ делегациясынын Kent State Universityге болгон визитинин алкагында кол коюлган Өз ара кызматташуу тууралуу меморандумдун уландысы болду.
Бул иш-чара эки жогорку окуу жайдын өнөктөштүгүн чыңдоонун маанилүү этабы болуп, «2+2» аттуу биргелешкен билим берүү программасынын ишке ашуусуна жол ачты.
Бул программа студенттерге эки жыл Бишкекте, эки жыл АКШда билим алып, эки университеттин дипломдорун алуу мүмкүнчүлүгүн берет.
Визиттин жүрүшүндө Kent State Universityнин өкүлдөрү КМТУнун жана Маалыматтык технологиялар институтунун жетекчилиги менен жолугушууларды өткөрүштү.
Тараптар академиялык өнөктөштүктү өнүктүрүү, академиялык мобилдүүлүк программаларын кеңейтүү жана биргелешкен илимий-билим берүү демилгелерин ишке ашыруу маселелерин талкуулашты.
Мындан тышкары, делегация Архитектура жана дизайн институтунун кийим дизайны кафедрасына барып, студенттердин чыгармачылык иштерин көрүштү. Жыйынтыгында КМТУ студенттеринин коллекцияларын Kent State University уюштурган мода көрсөтүүлөрүнө катыштыруу боюнча макулдашуу жетишилди.
Сапардын өзүнчө бөлүгү катары делегация Кыргыз Республикасынын илим, жогорку билим берүү жана инновациялар министринин орун басары Нурлан Кубатович Омуров менен жолугушту.
Жолугушууда КМТУ базасында атайын тил даярдоо борборун ачуу боюнча келишимге жетишилди. Бул борбор өлкө боюнча жогорку окуу жайлардын окутуучуларынын тилдик компетенцияларын өнүктүрүүгө жана эл аралык академиялык интеграцияны күчөтүүгө багытталат.
Kent State University делегациясынын сапары КМТУнун эл аралык кызматташтык байланыштарын мындан ары да чыңдап, студенттер жана окутуучулар үчүн академиялык жана маданий алмашуу мүмкүнчүлүктөрүн кеңейтет.
