WorldSkills Kyrgyzstan 2025 Улуттук чемпионатында 1-орун

2025-жылдын 14-апрелинен 17-апрелине чейин Экинчи Улуттук жумушчу кесиптер боюнча WorldSkills KYRGYZSTAN 2025 чемпионаты болуп өттү, анда аймактык чемпионаттын жеңүүчүлөрү негизги компетенциялар боюнча – ашпозчулук, мода технологиясы, ширетүү технологиялары боюнча даярдыктын жогорку деңгээлин жана кесиптик өсүүгө умтулуусун көрсөтүштү. Ширетүү технологиялары боюнча мелдештер Бишкек шаарындагы №4 кесиптик лицейдин устаканасынын базасында, ал эми ашпозчулук, мода технологиясы Раззаков атындагы КМТУнун устаканаларынын базасында өттү.

Чемпионаттын максаты - Кыргызстанда жаш адистер арасында мелдештерди уюштуруу аркылуу кесиптик билим берүүнү өнүктүрүү жана жумушчу кесиптердин кадыр-баркын жогорулатуу.

“Мода технологиясы” багытында конкурсанттар техникалык сүрөт тартуу, конструкциялоо жана моделдөө, ошондой эле даяр буюмду тигүү боюнча тапшырмаларды аткарышты.

И.Раззаков атындагы КМТУнун Кесиптик орто билим берүү (Колледж) «Костюм дизайны» билим берүү программасынын ДК-9-2-22 окуу тобунун 3-курсунун таланттуу студенти Сулайманова Мадина Алтынбековна «Мода технологиясы» компетенциясы боюнча I орунду ээлеп, 20000 сомдук сертификатка ээ болду.

Ал эми КОББ (Колледж) окутуучусу Жакыпбекова Асель Ишенбековна MasterSkills Kyrgyzstan 2025 сынагында «Мода технологиясы» компетенциясы боюнча II орунду ээледи.

Бул чоң жеңиш жана алдыга карай маанилүү кадам! Жаңы ийгиликтерди, шыктанууну жана ийгиликтерди каалайбыз!

Жеңүүчүлөр Кыргызстанды 2025-жылдын 27–29-ноябрында Тайбэйде өтө турган WorldSkills Asia мелдешинде көрсөтүшөт!